28 ديسمبر، 2008

مصر و فلسطين

إضافة صورةعذرا على الخروج عن موضوع المدونة و لكن لكل مقام مقال و لقد أصبحنا فى أحد مقامات الهزيمة و المقاومة و لا يسعنى سوى تذكر الكلمات فهى عزاء لمن يعجز عن الفعل .. و أضعف الإيمان أن تبقى الذاكرة و يبقى الضمير .
من أشعار أحمد فؤاد نجم
يا فلسطينية
و البندقاني رماكو
بالصهيونية
تقتل حمامكو ف حماكو
يا فلسطينية
و أنا بدي اسافر حداكو
ناري ف ايديا
وايديا تنزل معاكو
على راس الحية
و تموت شريعة هولاكو

يا فلسطينية و الغربة طالت
كفاية
و الصحرا آنت م الاجئين
و الضحايا
و الأرض حنت
للفلاحين و السقاية
و الثورة غاية
و النصر أول خطاكو

يا فلسطينية
و الثورة هي الأكيدة
بالبندقية
نفرض حياتنا الجديدة
و السكة
مهما طالت
و باتت بعيدة
مد الخطاوي
هو اللي يسعف معاكو

يا فلسطينية
فيتنام عليكو البشارة
بالنصرة طالعة
من تحت ميت ألف غارة
والشمعة والعة
و الأمريكان بالخسارة
راجعين حيارى
عقبال ما يحصل حداكو
أبجد هوز
حطى كلمن
إفتح صفحة
إمسك قلم
إكتب زى الناس ما بتنطق
سقطت سايجون رفعوا العلم
طلعت شمس اليوم ده أغانى
كل ما نسمع نعشق تانى
طلعت شمس اليوم ده حريقة
تكوى الجرح
و تبرى الألم
سايجون عادت للثوار
فوق الدم و تحت النار
جدوا فوجدوا
زرعوا
فحصدوا
و إحنا إيدينا للسمسار
و اللى قالوه السمسارجية
و اللى حكاه السمساردار
لما قروه القروانجية
بالمستعجل و المندار
هتش و نتش
بعزم الصوت
عن أمريكا و هول أمريكا
زعموا الفانتوم شايل موت
سقط الموت بعلم أمريكا
جاتكوا فضيحة
يا طبقة سطيحة
و عاملة فصيحة
و جايبة العار
كتبنجية
و فصحنجية
و سمسارجية
و سمساردار
سايجون درة يا ثوار
عادت حرة للأحرار
دا إحنا حانشبع بكرة أغانى
إسمع و إحفظ يا كتبانى
و إثبت عندك فى الأوراق
مصر بتنضح بالأشواق
مصر عروسة
و بكرة عريس
و العشاق
إحنا العشاق
بينا و لينا و بينا الثورة
إحنا الثورة و هى الناس
لينا الماضى و بينا الحاضر
و المستقبل هو الناس
كل الناس

هناك تعليقان (2):

wholesale jewelry يقول...
أزال أحد مشرفي المدونة هذا التعليق.
مصر 30 يقول...
أزال المؤلف هذا التعليق.